எங்கள் பண்பாடும், திருவிழாவும் , வழிபாடும் - பாகம் 2

மார்கழி பிறந்தாலே உடலும், உள்ளமும் குளிர்ந்து போகும் . இரவின் முன் பகுதியில் ஆரம்பிக்கும் பனி பொழிவு மறுநாள் காலை சூரியன் உதிக்கும் வரை தொடர்ந்து  கொண்டே இருக்கும் .ஆத்தூரில் இருந்து எங்கள் ஊர் செல்லும் பாதையின் இரண்டு  பக்கமும் வாழை தோட்டங்களும்  , வெற்றிலை கொடிக்காலும் , பனை , தென்னை மரத்தோட்டங்களுமாக பசுமை 

விரிந்து கிடக்கும் . வெற்றிலை கொடிக்காலில்  அகத்தி விதை முளைத்து இரண்டு அடி உயரம் வளர்ந்து இருக்கும் . அதன் இலைகள் மீது பனி பொழிந்து சிறு,சிறு நீர்த்திவலைகளை உருவாகி இருக்கும் . அதன் மீது இளம் காலை சூரிய ஒளிபட்டு அவை பச்சை மரகதம்போல் மின்னிக்கொண்டு இருக்கும் .

வாழைதோட்டங்கள் எல்லாம் நீர் தெளித்து கழுவிட்டது போல் பசுமையாக இருக்கும் . தென்னை , பனை ஓலைகளில்  இருந்து வழிந்து தரையில் சொட்டும் பனித்துளிகளை பார்த்தால் , மரத்தின் இளம் பாலைகளை சீவி விட்டால் சொட்டும் பதனீர் போல சொட்டிக்கொண்டே இருக்கும். அந்த காலை வேளைகளில்  தோட்டங்களுக்கு சென்றால் . பனித்துளிகளின் எடை தாளாமல் தலையை தனிந்து இருக்கும் புற்களையும் , மரங்களையும் கடந்து போக முற்ப்பட்டு கையால் தொட்டாலே , அவை தலையை சிலிர்த்து தன் மீது பனிந்துகிடக்கும் பனித்துளிகளை நம் மீது வீசி தலையை  நிமிர்ந்தும் . நமக்கு ஆற்றில் குளித்து விட்டு வந்தார் போல்  உடை முழுவதும் நனைத்து இருக்கும் . அவற்றின் குளிர்ந்த பரிசம்  நமக்கு புத்துணர்ச்சியை கொடுக்கும் ..மார்கழியின் அதிகாலை வேளையில்  அதிக செறிவு நிறைந்த ஆக்ஸிஜன் அடுக்கு ( ஓசோன் O3 ) பூமிக்கு அருகில் வரும் என்றும் அவற்றை சுவாசிப்பது நமக்கு நல்லது என்றும் அறிவியல் கூறுகின்றது .

             எங்கள் ஊரில்  பெண்கள் எல்லாம் அதிகாலையிலேயே எழுந்து வாசலில் நீர்தெளித்து ; நேர் புள்ளி கோலம் , ஊடு புள்ளி கோலம் , கம்பி கோலம் என வித விதமான கோலங்கள் வரைந்து . கோலத்தின் நடுவில் பசும் சாணத்தை கொண்டு பிள்ளையார் பிடித்து வைத்து அவற்றின் தலையில் வீட்டு தோட்டத்திலோ, வேலிகளிலோ படர்ந்து கிடக்கும் மஞ்சள் நிற பூசணி , பீர்க்கு கொடியின் பூவையோ அல்லது சிவந்த செம்பருத்தி பூவையோ சொருகி வைப்பாரகள். 

       மார்கழியில் காலையில் எழுந்திருப்பது நல்லது தான் . ஆனால் அந்த நேரத்தில் தான் வெளியில் இருக்கும் குளிரில் இருந்து தப்பித்து போர்வையை  தலை முதல் கால் வரை இழுத்து போர்த்தி கொண்டு , அந்த போர்வை தரும் கதகதப்புக்குள் சுகமாக தூங்க மனம் ஏங்கும் . ஆனால் வீட்டில் அப்பா தினமும் காலை ஐந்து மணிக்கே எழுந்து கடைக்கு புறப்படும் போது எங்களையும் கட்டாயப்படுத்தி எழுந்திருக்க வைத்து விடுவார் . எங்கள் வீட்டின் பின்பக்கம் பெரிதாக வளர்ந்து படர்ந்து இருந்த புளியமரத்தின் கீழே ஒரு பொதுகிணறு இருக்கின்றது . பெரும்பாலும் அங்குதான் எங்கள் குளியல் , சில நாட்கள் வாய்க்காலுக்கு செல்வோம். கோடையிலேயே ஓடிக்கொண்டு இருக்கும் ஆற்றின் நீரைவிட,  கிணற்றில் ஊற்றெடுத்து நிறைந்து இருக்கும் நீர்  குளிர்ச்சியாக இருக்கும் . மார்கழி மாதம் சொல்லவே வேண்டாம்.  சிறு துளி நீர்பட்டாலே உடம்பில் இருக்கும் ரோமங்கள் எல்லாம் சிலிர்த்து நிக்கும் . முதல் இரண்டு வாளி தண்ணீர் உடம்பில் படும் போது மிகவும் குளிரும்,  மூன்றாம் , நான்காம் வாளி தண்ணீருக்கு உடல் சற்று அந்த குளிர்ச்சியை பழகி இருக்கும் . பின்பு சோப்பு போட்டு விட்டு மீண்டும் சில வாளி தண்ணீரை தலையில் ஊத்தி விட்டு வந்தால் . வீசும் வாடை காற்றுக்கு உடலில் கை ,கால்கள் எல்லாமே நம் கட்டுப்பாட்டை தாண்டி நடுங்க , தாடைகள் இரண்டும் தந்தி அடிக்க ஆரம்பித்து விடும் . அப்போது எனது நிலமை.! 

" ஆடையின்றி வாடையின் மெலிந்து

கையது கொண்டு மெய்யது பொத்திக்

காலது கொண்டு மேலது தழீஇ !!

நாராய் ! நாராய் !! செங்கால் நாராய் ! 

என பாடிய புலவரின் நிலமை  போலத்தான் எனது நிலைமையும் .. பின்பு உடை மாற்றிக்கொண்டு கோவிலுக்கு சென்றாலும் கையது கொண்டு மெய்யது போர்த்திய நிலை தான் அந்த நிலைமை மாற சில மணித்துளிகள் பிடிக்கும் . 

                கோவில் கூடி இருக்கும் சிறுவர்கள் அனைவரும் எங்கள் ஊர் பெரியவர் ஒருவரின் தலைமையில் கையில் சிங்கி ( ஜால்ரா ) மற்றும் தப்பு வைத்து தட்டிக்கொண்டே .பிள்ளையார் கோவிலில் இருந்து . 

அரகர நம பார்வதி பதயே ! ( பெரியவர் )

  அரகர  மகாதேவா!  ( பின் கோஷம்)

கோவிந்த நாம சங்கீர்த்தனம்!  ( பெரியவர் )

கோவிந்தா ! கோவிந்தா !  ( பின் கோஷம்  )

"தென்னாடுடைய சிவனே போற்றி!  ( பெரியவர் )

எந்நாட்டவர்க்கும் இறைவா போற்றி!  ( பின் கோஷம்)

என்ற கோஷத்துடன் ஆரம்பித்து. பெரியவர் பாடும் பக்தி பாடல்களை பின்னால் பாடிக்கொண்டே மாறாத தாளத்துடன்.  ஊரை முழுவதுமாக சுற்றி வருவோம் . சில வீடுகளில் எங்களுக்கு சூடான கருப்பட்டி காப்பி தருவார்கள் .

  இரண்டு சுக்கு தட்டி போட்டு தயாரித்த அந்த கருப்பட்டி காப்பியை அந்த குளிர்ந்த சூழ்நிலையில் நாம் சாப்பிடும்போது அது நாவில் பட்டு , உணவுக்குழாயில் இறங்கி இரப்பையை அடைந்தவுடன் உடல் சற்று கதகதப்பும்,சுறுசுறுப்பும் அடைவதை நாம் உணர முடியும்..  அவ்வாறு ஊரை சுற்றி கடைசியாக கோவிலை வந்து சேர்வோம். நாங்கள் வந்ததும் கோவிலில் பூஜை நடக்கும் . பிரசாதமாக தயிர் சாதம் , புளிசாதம் கிடைக்கும் . 

பின்பு பள்ளி ஆரம்பிக்கும் வரை கபடி ஆடுவோம்.  மார்கழி முழுவதும் இவ்வாறு சிறப்பாக இருக்கும் .
 மார்கழி மாதத்தில் வரும் வளர்பிறை பதினொன்றாம் நாள் . வைகுண்ட ஏகாதசி சிறப்பு பூஜை ஊரில் உள்ள ஒரு குடும்பத்தை சேர்ந்தவர்களின் செலவில் சிறப்பாக நடைபெறுகின்றது .

தை திருநாள் :-

                 

  தமிழர்களின் தனிப்பெரும் திருவிழாவாகத் திகழ்வது பொங்கல் திருநாள் . தமிழர்களுக்கு தேசிய இனத்துக்கான அடையாளம் ஒன்றைத் தருவது இந்த திருநாள் ஆகும் .

                  மானுட பண்பாட்டுயியல் ஆராய்ச்சியாளர் தொ. பரமசிவன் அவர்கள் தன்னுடைய பண்பாட்டு அசைவுகள் என்னும் நூலில் பொங்கல் திருநாள் பிறப்பு ,இறப்பு தீட்டுகளால் தடைபடாத திருநாள் என்றும் .  திருநாள் அன்று வீட்டில் ஓருவர் இறந்து விட்டால் , அவர் உடலை எடுத்தபிறகு  வீட்டை அவசரமாக சுத்தம் செய்து பொங்கல் இடும் வழக்கம் நெல்லை மாவட்டங்களில் காணப்படுகின்றது என்றும் தன் ஆராய்ச்சி கட்டுரைகளில் எழுதி இருக்கிறார் .

            எங்கள் ஊரில் மார்கழியின் இறுதி நாட்களில் பொங்கல் திருநாள் ஆயத்த பணிகள் மக்களிடம் தொற்றி கொள்ளும் .  மேலாத்தூர் மணல் மேடு மற்றும் எங்கள் ஊர் அம்மன் கோவிலுக்கு எதிர் புறம் வாய்க்காலுக்கு செல்லும் வழியில் உள்ள சுப்பன்தண்டில் உள்ள மணல் மேடு போன்ற பகுதிகளில் இருந்து எளிதில் இறுகும்  நல்ல தரமான களிமண்ணை அள்ளிவந்து . வீட்டின் முற்றங்களில் இருக்கும் பள்ளங்களில் கொட்டி சமதளப்படுத்துவார்கள். மீதம் இருக்கும் களிமண்ணை குழைத்து நெல் அளக்கும் நாளிகளை பயன்படுத்தி பொங்கல் அடுப்பு கட்டிகள் செய்து  காயவைத்து ,  சுண்ணாம்பு கரைசல் கொண்டு வண்ணம் பூசுவார்கள்..

         

எங்கள் பகுதிகளில்  விதவிதமான வண்ணங்களும், ஆயில் பெயிண்டுகளும் பிரபலமாகத காலம் அது . பெரும்பாலும் அணைத்து வீடுகளிலும் வெள்ளை சுண்ணாம்பு  தான் பூசுவார்கள் . வீட்டுல வெள்ளை அடிச்சாச்சா!! ஆரம்பிச்சாச்சா !! என மக்கள் சாதாரணமாக கேட்கும் கேள்விகளில் இருந்தே வண்ணம் பூசுவது என்றாலே அந்தக்காலங்களில் வெள்ளை வண்ணம் பூசுவதுதான் என்பதை தெரிந்து கொள்ளலாம் . வெள்ளை அடிப்பதற்கு தென்னம்பாளை காம்பின் தடித்த பகுதியை சுத்தியலால் நன்றாக தட்டி அதைத்தான் வெள்ளையடிப்பதற்கு பயன் படுத்துவார்கள் .   சுண்ணாம்பு தயாரிப்பதை பார்ப்பதே அவ்வளவு அழகாக இருக்கும் . அது ஒரு வேதியல் நிகழ்வு , சுண்ணாம்பு கரைசல் தயாரிப்பதற்கான சுண்ணாம்பு சிப்பிகள் ஊருக்குள் வந்து விற்பனை செய்வார்கள். அவற்றை வாங்கி  பெரிய மண்பானையில் கொட்டி அவற்றுடன் தண்ணீர் சேர்ப்பார்கள் . சிறிது நேரத்தில் அவை அதிக வெப்பத்தை வெளியிட்டு கொதிக்க ஆரம்பித்த சிறிது நேரத்தில் சிப்பிகள் எல்லாம் நீர்த்து போய் மென்மையான, பால் போன்று வெண்மையான  தெரிந்த சுண்ணாம்பாக மாறி இருக்கும் . இந்த சுண்ணாம்பு தான் சுவர்களில் வண்ணம் பூசவதற்கும்,  வெற்றிலை பாக்கு போடுவதற்கும்,  விஷக்கடிக்கு மருந்தாகவும், கட்டுமான பணிகளுக்கும் பயன்படுகின்றது. 

   வீடுகளில் பரண்களில் வைத்திருக்கும் பித்தளை , செம்பு பாத்திரங்கள் அனைத்தும் புளியும் , தேங்காய் நாரும் ,வைத்து தேய்த்து கழுவி சுத்தம் செய்து மீண்டும் சுத்தமான பரண்களில் கவிழ்த்து வைப்பார்கள் .

தாத்தாவின் பழைய டிரங்கு பெட்டிகளில் இருக்கும் புத்தகங்கள் சுத்தம் செய்யப்பட்டு புதிதாக பாச்சான் உருண்டைகள் ( naphthalene balls ) வைத்து பாதுகாப்பாக மீண்டும் பரண்களில் ஏற்றப்பட்டு.வீட்டில் இருக்கும் பனை நாற்கட்டில் அனைத்தும் வெந்நீர் ஊற்றி சுத்தம் செய்து . வீட்டின் பூஜை அறை மற்றும்  அனைத்து வாசற்படிகளிலும் சுண்ணாம்பினால் கோலங்கள் வரைந்து . திண்ணைகளில் காவிக்கட்டியை கரைத்து பட்டை, பட்டையாக கோடுகள் வரைந்து . வீட்டையே கோவிலாக மாற்றி இருப்பார்கள் .

       பொங்கலுக்கு முதல் நாள் போகிப்பண்டிகை அன்று வீட்டில் அனைவருக்கும் புத்தாடை வாங்கி ,  வாழைத்தார்கள் வெட்டி ஊத்தம் போட்டு எடுத்து. பொங்கப்பூ, அருகம்புல் எல்லாம் பறித்து வந்து,  கரும்பு , மஞ்சள் மற்றும் மளிகை பொருட்களை வாங்கி,பனை ஓலை வெட்டி காயவைத்து என அனைத்து வகையிலும்  மறுநாள் பொங்கலுக்கு தயாராகி விடுவோம். அப்பா அவருடன் பிறந்த பெண் உறவுகளுக்கு பொங்கல் படி கொடுப்பதை வழக்கமாக வைத்து இருந்தார் . ( அதை அவர் இறக்கும் வரை கொடுத்து கொண்டு இருந்தார்) நான் தான் கொண்டு செல்வேன் . அப்படி அத்தை வீடுகளுக்கு போகும் போது அனைவரிடம் இருந்தும் பொங்கல் பரிசாக பணம் கிடைக்கும் . எனக்கு  பொங்கல் செலவுக்கு தேவையான பணம் கிடைத்து விடும் . .உறவினர்களுக்கும் , நண்பர்களுக்கும் பொங்கல் வாழ்த்துக்கு அட்டைகளை வாங்கி அனுப்பி இருப்போம் . 

       பொங்கல் அன்று காலையிலேயே எழுந்து குளித்து விட்டு சாமி படத்துக்கு முன்பு வைத்து இருக்கும் புதுத்துணிகளின் சட்டை காலர்களில் மஞ்சள் வைத்து அனைவருக்கும் அப்பா எடுத்துதருவார். பின்பு வீட்டின் முற்றத்தில் அடுப்புகட்டியை வைத்து பானையில் கழுத்து வரைக்கும் தண்ணிர் வைத்து பொங்கல் இடுவோம். இரண்டு பானைகளில் பொங்கல் வைப்போம் ஒன்று வெண்பொங்கல் மற்றொன்று சர்க்கரைபொங்கல் .

     

 சேனை ,சேம்பு,கருனை, சிறுகிழங்கு போன்ற கிழங்கு வகைகளையும் ( இந்த கிழங்கு வகைகள் காலங்காலமாக பெருங்கோவில்களாலும்,  பார்ப்பனர்களாலும் விலக்கப்பட்ட உணவு வகைகள் மற்றும் பிறப்பு , இறப்பு என எந்த தீட்டுகளாலும் பாதிக்கப்படாத திருநாள் என்பதில் இருந்தும்  தை பொங்கல் திருநாள் தமிழர்களின் திருநாள் என்பதும் அது பார்பனியத்தில்  இருந்து விலகி இருப்பதையும் அறியலாம்.  ) மொச்சை,  தட்டப்பயிறு, கொண்டக்கடலை , பட்டாணி  , துவரம் பருப்பு போன்ற பயிறு வகைகளும் , அவரை ,கொத்தவரை , முருங்கைக்காய் , முள்ளங்கி , பரங்கிக்காய் ,பூசணிக்காய் , வாழைக்காய் ,கேரட் , நூக்கல்,  பாகற்காய் ,புடலங்காய் , கத்தரிக்காய் , மாங்காய் , எலுமிச்சை ,பச்சை மிளகாய் , உள்ளி  போன்ற காய்களையும் போட்டு அம்மா பொங்கல் குழம்பு வைப்பார்கள் . அட அட எழுதும் போதே வாயில் எச்சில் ஊறுது.

     

 அதே நேரம் பொங்கலும் பொங்கி வந்துவிடும் . பொங்கும் போது அனைவரும் சேர்ந்து பொங்கலோ! பொங்கல் !! , பொங்கலோ !! பொங்கல் என உறக்க கத்துவோம்.  பெண்கள் குலவை சத்தம் போடுவார்கள். .

அங்கேயே வாழையிலை போட்டு வாழைத்தார் , கரும்பு , மஞ்சள்லோடு சாணத்தில் பிள்ளையார் மற்றும் அருகம்புல் , பொங்கல் பூ , பொங்கி வைத்த பொங்கல் , சுட்டு வைத்த பனங்கிழங்கு ஆகியவற்றை வைத்து வழிபடுவோம்.. 

" பகுத்துண்டு பல்லுயிர் ஓம்புதல் நூலோர்

தொகுத்தவற்றுள் எல்லாந் தலை"

என்னும் வள்ளுவரின் குறளுக்கேற்ப..

சிறு சிறு இலைகளில் பொங்கலை வைத்து . பறவைகளுக்கு வைத்து விட்டு அதன் பிறகுதான் அனைவரும் ஒன்றாக அமர்ந்து சாப்பிடுவோம். 

      கானும் பொங்கலுக்கு மக்கள் அனைவரும் குடும்பத்துடன்  நீர்நிலைகளுக்கு செல்வது வழக்கம் .  எங்கள் ஊரில் அனைவரும் அருகில் உள்ள தண்ணீர் சுத்திகரிப்பு நிலையத்துக்கு சென்று அங்கு இருக்கும் மரங்களில் நிழலில் அமர்ந்து உணவருந்தி , ஓடியாடி விளையாடிவிட்டு இரவு சாயும் நேரம் தான் வீட்டுக்கு வருவோம் .

அந்த நாட்களை நினைத்து பார்க்கும் போது .. கவிஞர் விக்ரமாதித்யனின் பின்வரும் வரிகள் தான் நியாபகம் வருகின்றன..

" விரும்பியது நதிக்கரை நாகரீகம் !

     

    விதிச்சது நகர நாகரீகம் !.

தொடரும் ...

- விக்கி இராஜேந்திரன் . ✍✍✍